बुद्धको जन्म नेपालमा भएको भारतले स्वीकार्यो, गोंगबु क्षेत्रमा विभत्स हत्या
भारतीय विदेशमन्त्री एस जयशंकरले बुद्ध भारतमा जन्मिएको अभिव्यक्ती दिएपछि त्यहाँको विदेश मन्त्रालयले आज उक्त अभिव्यक्तीलाई सुधार्दै बुद्धको जन्म नेपालमा नै भएकोमा कुनै दुई मत नभएको बताएको छ। आज साँझ भारतको विदेशमन्त्रालयले विज्ञप्ती जारी गर्दै बुद्ध लुम्बिनीमा जन्मिएको र लुम्बिनी नेपालमा नै रहेको स्पष्ट पारेका छन् । धेरै लामो समयदेखि बुद्धको जन्मभूमि बारेमा विभिन्न प्रश्नहरु उठिरहेका थिए, तर आज भारतको विदेश मन्त्रालयले यसलाई स्पष्ट पारिदिएको छ। पछिल्लो समयमा नेपालको प्रधानमन्त्री केपी शर्मा ओलीले रामको जन्म भूमि नेपाल भएको भनेर अभिव्यक्ती दिएका छन् । बुद्धपछि पछिल्लो समय अहिले दुई देशमा रामको जन्मभूमि बारे चर्चा शुरु भएको छ । त्यसबाहेक आज बिहान काठमाडौँको गोंगबु क्षेत्रमा विभत्स रुपमा भेटिएको शवको खबर दिनभर चर्चामा रह्यो । प्याक गरेर राखिएको सुटकेसमा टाउको र खुट्टा बिनाको शव फेला परेपछि प्रहरीले यसबारेमा अनुसन्धान थालेको छ। शवको टाउको र खुट्टा भने सुटकेस राखिएको स्थान भन्दा ३०० मिटर टाढा भेटिएको थियो ।