घर कर्जाको सीमा ३ करोड, पहिलो घर खरिदमा ८० प्रतिशतसम्म ऋण पाइने

काठमाडौं । नेपाल राष्ट्र बैंकले व्यक्तिगत आवासीय घर निर्माण तथा खरिदका लागि प्रवाह हुने कर्जाको सीमा बढाएको छ । आर्थिक वर्ष २०८२/८३ को मौद्रिक नीतिको वार्षिक समीक्षा प्रतिवेदनमार्फत राष्ट्र बैंकले यस्तो कर्जाको सीमा २ करोडबाट बढाएर ३ करोड रुपैयाँ पुर्‍याएको हो ।

राष्ट्र बैंकद्वारा सार्वजनिक प्रतिवेदनमा उल्लेख भएअनुसार निजी आवासीय घर निर्माण/खरिद गर्न प्रवाह गर्ने कर्जाको सीमा रु. २ करोडबाट बढाई रु. ३ करोड कायम गरिएको छ । यो व्यवस्थाले विशेषगरी शहरी क्षेत्रमा घरजग्गाको बढ्दो मूल्यका कारण कर्जा लिन कठिनाइ भोगिरहेका सर्वसाधारणलाई राहत पुग्ने अपेक्षा गरिएको छ । यसले सुस्ताएको घरजग्गा कारोबारलाई पनि केही गति दिने अनुमान छ ।