बनेपामा निजी जग्गामा सडक विस्तारको विवाद, वडाध्यक्षमाथि २ लाख लेनदेनको आरोप

काभ्रे । बनेपा नगरपालिका वडा नं. ४ (साविक उग्रचण्डी नाला) मा निजी जग्गाभित्र विना मुआब्जा सडक विस्तार गरिएको विवादले उग्र रूप लिएको छ। यो विवाद सडक निर्माणमा मात्र सीमित नभएर जनप्रतिनिधिले मिलाउने आश्वासनमा आर्थिक लाभ लिएको आरोप समेत लागेको छ ।

कञ्चनपुर स्थायी घर भएका जग्गाधनी पद्मराज जोशीले आफ्नो कित्ता नं. १७४१ को १ रोपनी २ आना जग्गाभित्र नगरपालिकाले बलपूर्वक सडक र ढल निर्माण गरेको रातोपाटीलाई बताए । यस विवादमा उच्च अदालत पाटनमा मुद्दा दायर गरेको र अदालतले फैसला गरिसक्दा समेत क्षतिपूर्ति पाउन नसकेको उनको भनाइ छ ।