राहदानी छपाइ र वितरणका लागि नयाँ प्रणाली लागू गरिँदै [भिडियो]

काठमाडौँ। परराष्ट्रमन्त्री शिशिर खनालले राहदानी (पासपोर्ट) छपाइ र वितरणमा देखिएका समस्याहरूको दीर्घकालीन समाधानका लागि सरकारले नयाँ प्रणालीमा सङ्क्रमण (ट्रान्जिसन) गर्न लागेको बताएका छन्।

मङ्गलवार राष्ट्रिय सभाको बैठकमा विनियोजन विधेयकमाथि सांसदहरूले उठाएका प्रश्नको जवाफ दिँदै मन्त्री खनालले आगामी सोमवारदेखि नयाँ कम्पनीमार्फत राहदानी छपाइ कार्य सुरु हुने स्पष्ट पारे। मन्त्री खनालका अनुसार अघिल्लो वर्ष नै अन्तर्राष्ट्रिय बोलपत्रमार्फत नयाँ कम्पनीलाई ठेक्का दिइएको भए पनि कानुनी र प्राविधिक अड्चनका कारण कार्यान्वयनमा केही ढिलाइ भएको थियो।