अमेरिका थप सहयोग गर्न इच्छुक

नेपालमा भोटेकोशी हिमबाढीले गराएको जनधनको ठुलो क्षतिको घटनालाई अमेरिका सरकारले निकै चासोका साथ हेरेको छ । नेपाल–अमेरिका द्विपक्षीय सम्बन्धको साझेदारीको आयामभन्दा माथि उठेर नेपालको विपत्मा सघाउन अमेरिका सरकारले इच्छा जाहेर गरेको छ ।

सोही क्रममा राष्ट्रिय स्वतन्त्र पार्टीका सभापति रवि लामिछाने र अमेरिकाका विदेशमन्त्री मार्को रुबियोबिच टेलिफोन संवाद भएको छ । अमेरिकाका विदेशमन्त्री रुबियोले नेपालमा भदौ १० गते लामटाङ लिरुङ हिमालबाट भोटेकोशी नदी हुँदै आएको हिमबाढीले निम्त्याएको महाविपत्तिप्रति अमेरिका सरकारका तर्फबाट ऐक्यबद्धता प्रकट गर्नुभयो । आइतबार राति करिब ९ बजे विदेशमन्त्री रुबियोले रास्वपाका सभापति लामिछानेलाई टेलिफोन गर्नुभएको लामिछानेका सचिवालय प्रतिनिधि अविनाश आचार्यले जानकारी दिनुभयो । उहाँका अनुसार टेलिफोन संवादका क्रममा विदेशमन्त्री रुबियोले भन्नुभयो, “तपाईंहरूलाई ठुलो विपत्को सङ्कट यतिबेला आइपरेको छ, यसबाट हामी (अमेरिका) पनि निकै दुःखी छौँ, दुःखको यस क्षणमा हामी नेपालसँगै उभिएका छौँ ।”