रेन्बो ट्राउटमा भविष्य खोज्दै गणेश: वैदेशिक रोजगारी छाडेर बने सफल मत्स्य उद्यमी

जुम्लाको दुर्गम पातारासी गाउँपालिका–६, घोडासिनका ३५ वर्षीय गणेश बुढाले वैदेशिक रोजगारीको कठिन अनुभवपछि आफ्नै गाउँमा रेन्बो ट्राउट माछापालन सुरु गरेर सफल उद्यमीको परिचय बनाएका छन्। आज उनी जुम्लामै उच्च मूल्यको ट्राउट माछा उत्पादन गर्दै अन्य युवाका लागि प्रेरणाको स्रोत बनेका छन्।

गणेशले २०६६ सालमा जुम्लाको सदरमुकाम खलंगास्थित चन्दननाथ माध्यमिक विद्यालयबाट एसएलसी दोस्रो श्रेणीमा उत्तीर्ण गरेका थिए। त्यसपछि रोजगारीको खोजीमा सन् २०१२ मा साउदी अरब गए। दुई वर्षको बसाइपछि करिब ४ लाख रुपैयाँ ऋण बोकेर स्वदेश फर्किएका उनी सन् २०१५ मा कुवेत पुगे र त्यहाँ चार वर्ष काम गरे।