पाँचथरमा बाढीपहिरोको वितण्डा: घर, पुल र निर्माण सामग्री बगायो, मध्यपहाडी राजमार्ग अवरुद्ध

शुक्रबार राति अविरल वर्षापछि आएको बाढी र पहिरोले पाँचथरका विभिन्न स्थानमा ठूलो क्षति पुर्‍याएको छ । याङवरक गाउँपालिका र हिलिहाङ गाउँपालिकाका विभिन्न क्षेत्रमा घर, झोलुङ्गे पुल तथा निर्माणाधीन पुल बगाउँदा जनजीवन प्रभावित बनेको छ ।

जिल्ला प्रहरी कार्यालय पाँचथरका प्रहरी नायब उपरीक्षक अनिषकुमार कर्णका अनुसार बाढीपहिरोबाट याङवरक गाउँपालिका–१ लम्बा खोलामा माथिबाट आएको पहिरोले स्थानीय मोहनलाल खवासको जस्तापाताले छाएको, ढुङ्गा–माटोको गारो भएको दुईतले घर पूर्ण रूपमा बगाएको छ । उक्त स्थानकै ४४ वर्षीय कवीर खवासको दुईतले घर पनि पहिरोले बगाएको प्रहरीले जनाएको छ । पहिरोसँगै आएको बाढीले उहाँको गाईगोठमा बाँधिएका तीन वटा गोरुसमेत बगाएको छ ।