त्रिपक्षीय साझेदारीबाट नेपाललाई ग्लोबल हब बनाउन सम्भव छ -पूर्वउपकुलपति डा. थापा

काठमाडौं । काठमाडौं विश्वविद्यालयका पूर्वउपकुलपति प्रा.डा. भोला थापाले नेपाललाई विश्वकै उत्कृष्ट शैक्षिक केन्द्र (एजुकेसन हब) का रूपमा विकास गर्न सरकार, समुदाय र निजी क्षेत्रबीच बलियो त्रिपक्षीय साझेदारी आवश्यक रहेको बताएका छन् ।

केन्द्रबिन्दु अनलाइन मिडिया प्रालिको आयोजनामा मंगलबार ललितपुरमा सम्पन्न ‘चौथो केन्द्रबिन्दु एजुकेसन एक्सिलेन्स अवार्ड २०८३’ मा वक्ता रहेका डा. थापाले नेपालमा विदेशी विद्यार्थी भित्र्याउने बहस नयाँ नभएको र यसको जग विगतकै नीतिहरूले बसालेको स्मरण गरे । नेपालले चिकित्सा शिक्षा लगायतका विधामा अन्तर्राष्ट्रिय स्तरको जनशक्ति उत्पादन गरेर आफ्नो क्षमता प्रमाणित गरिसकेकाले अब यसलाई अझ व्यापक र व्यवस्थित बनाउनुपर्नेमा उनले जोड दिए ।