बाढी प्रभावित क्षेत्रमा स्याटलाइटमार्फत एनसेलले दियो नि:शुल्क इन्टरनेट सेवा

कठमाडौं । निजी क्षेत्रको दूरसञ्चार सेवा प्रदायक एनसेलले भोटेकोशी नदीमा आएको विनाशकारी बाढीबाट प्रभावित क्षेत्रहरूमा स्याटलाइट प्रविधिमार्फत इन्टरनेट सेवा उपलब्ध गराउन थालेको छ । बाढीका कारण परम्परागत सञ्चार सञ्जाल अवरुद्ध भएका स्थानहरूमा खोज, उद्धार र राहत कार्यलाई सहज बनाउन यो विशेष पहल गरेको हो ।

एनसेलले युटेलस्याटको ‘लो अर्थ अर्बिट’ (LEO) स्याटलाइटमार्फत सञ्चालित उपकरणहरू प्रयोगमा ल्याएको छ । यो प्रविधिले जमिनको पूर्वाधार (फाइबर वा टावर) क्षतिग्रस्त भएको अवस्थामा पनि अन्तरिक्षमा रहेका स्याटलाइटमार्फत सिधै इन्टरनेट कनेक्टिभिटी प्रदान गर्ने प्राविधिकले बताएका छन् । एनसेलले सरकारी निकायहरूसँगको समन्वयमा राहत वितरण केन्द्र, अस्थायी शिविर र आपत्कालीन कार्य हुने स्थानहरूमा यो सेवा जडान गरिरहेको हो ।