सुदूरपश्चिमका युवा सोध्छन् : परिवर्तन भयो, तर अपेक्षा पूरा भयो त ?

धनगढी । ‘युवा एकजुट भए दुई दिनमै सरकार बदल्न सक्ने आँट राख्छन्, अब देश बदल्ने जिम्मेवारी पनि युवाकै हो,’ कैलालीकी रञ्जना चौधरीको यो भनाइले जेनजी आन्दोलनको एक वर्षपछि सुदूरपश्चिमका युवाको मनोभाव प्रस्ट्याउँछ ।

आन्दोलनले युवामा राजनीतिक चेतना र राज्यप्रतिको प्रश्न गर्ने साहस बढाएको उनीहरूको निष्कर्ष छ । उनीहरूका लागि आन्दोलनको उद्देश्य सरकार परिवर्तनमा मात्र सीमित छैन, सुशासन, जवाफदेहिता, रोजगारी, न्याय र राज्यका हरेक तहमा अर्थपूर्ण युवा सहभागिता अझै पूरा हुन बाँकी एजेन्डा हुन् ।