१२ हजार घुससहित वन कार्यालयका हाकिम पक्राउ

सिरहाको सव-डिभिजन वन कार्यालय बन्दीपुरका कार्यालय प्रमुख (अधिकृत आठौं) राम केवल राय यादव घुस रकमसहित पक्राउ परेका छन् । अख्तियार दुरुपयोग अनुसन्धान आयोगको कार्यालय, बर्दिवासबाट खटिएको टोलीले उनलाई सेवाग्राहीबाट घुस लिइसकेको अवस्थामा रङ्गेहात नियन्त्रणमा लिएको हो ।

कार्यालय प्रमुख यादवले उद्योगका लागि ल्याइएको काठहरू सिलबन्दीअनुसार भए/नभएको रुजु गरी कागजातसहितको फाइल फिर्ता गर्ने प्रक्रियामा सेवाग्राहीलाई दु:ख हैरानी दिँदै घुस माग गरेका थिए । सोही सूचना एवं उजुरी निवेदनका आधारमा अख्तियारको टोली परिचालन भएको थियो ।