अभिषेक गिरीको ‘क्राइम बिजनेस’

११ असारमा पक्राउ परेका अभिषेक गिरी उच्च अदालत विराटनगरको आदेशबाट छुट्नासाथ सोमबार (२२ असार) राति फेरि प्रहरीको नियन्त्रणमा परे। यसपटक उनलाई पक्राउ गर्न केन्द्रीय अनुसन्धान ब्युरो (सीआईबी)को टोली विराटनगर पुगेको थियो। पक्राउलगत्तै ४८ वर्षीय गिरीलाई रातारात काठमाडौँ ल्याइयो। मंगलबार जिल्ला अदालत काठमाडौँले ठगी तथा आपराधिक लाभसम्बन्धी कसुरमा गिरीलाई तीन दिन हिरासतमा राखेर अनुसन्धान गर्न प्रहरीलाई अनुमति दिएको छ।

सीआईबीको अनुसन्धान एक निर्माण व्यवसायीको जाहेरीबाट सुरु भएको हो। हेटौँडास्थित श्रेष्ठ कन्स्ट्रक्सनका सञ्चालक सुभाष श्रेष्ठले गिरीविरुद्ध ज्यान मार्ने धम्की दिएर आपराधिक लाभ लिएको जाहेरी सीआईबीमा दिएका छन्। “गिरीले सडकका एक ठेकेदारलाई ठेक्का मिलाइदिने भन्दै असुली गरेको आरोप छ। पछि ठेक्का नै नमिलाई उल्टै ठेकेदारलाई ज्यान मार्ने धम्की दिँदै असुलेको जाहेरी छ,” सीआईबीका प्रवक्ता प्रहरी वरिष्ठ उपरीक्षक (एसएसपी) अनुपमशमशेर जबरा भन्छन्।