टोपबहादुर र बालकृष्णको राजनीतिमा लाग्न सक्छ ‘ब्रेक’, विगतमा को–को भए बदनाम ?

काठमाडौँ । चर्चित नक्कली भुटानी शरणार्थी प्रकरणमा पूर्वउपप्रधानमन्त्री टोपबहादुर रायमाझी र पूर्वगृहमन्त्री बालकृष्ण खाण दोषी ठहर भएपछि उनीहरूको राजनीतिक भविष्यमाथि प्रश्न उठेको छ । काठमाडौँ जिल्ला अदालतले सोमबार सुनाएको फैसला अनुसार प्रतिवादीहरूमध्ये पूर्वउपप्रधानमन्त्री रायमाझीलाई राज्यविरूद्धको कसुर, ठगी तथा संगठित अपराधमा दोषी ठहर गरिएको छ । पूर्वगृहमन्त्री खाणलाई सोही कसुरमा सहयोगी (मतियार)का रूपमा दोषी ठहर गरिएको हो ।

प्रतिनिधि सभा सदस्य निर्वाचन ऐन, २०७४ को दफा १३ उपदफा (घ) अनुसार नैतिक पतन देखिने फौजदारी कसुरमा सजाय पाएको व्यक्ति निर्वाचन लड्न पाउँदैन । संगठित अपराध निवारण ऐन, २०७० अनुसार यस्तो कसुर गर्नेलाई अन्य सामान्य अपराधको तुलनामा ५० प्रतिशत थप सजाय हुन्छ । अदालतले दोषी ठहर गरेकाले रायमाझी र खाणको राजनीतिक भविष्यमागि गम्भीर प्रश्न उठेको हो । यद्यपि पुनरवलोकनका लागि सर्वोच्च अदालतसम्म जाने कानुनी बाटो भएकाले प्रतिवादीले सफाइको मौका पाउनेछन् । उनीहरू विरुद्ध जेल सजाय सम्बन्धमा असार २९ गते सुनुवाइ हुने काठमाडौँ जिल्ला अदालत प्रशासनले जनाएको छ ।