नेपालमा भित्रियो एकोरको लाइफस्टाइल ब्रान्ड ट्राइब, सब्रिना होटेलसँग भयो सम्झौता

काठमाडौंको बुढानिलकण्ठ स्थित गणेश चोकमा अवस्थित सब्रिना होटल लिमिटेड अब विश्वप्रसिद्ध फ्रान्सेली होटल ग्रुप एकोर (Accor) को लाइफस्टाइल ब्रान्ड ‘ट्राइब’ (TRIBE) को नामबाट सञ्चालनमा आउने भएको छ। यस ऐतिहासिक साझेदारीका सम्बन्धमा सब्रिना होटल लिमिटेडले मे २२ मा होटल परिसरमै पत्रकार सम्मेलन आयोजना गरी औपचारिक जानकारी दिएका हुन्।

यसअघि सब्रिना होटल र ट्राइब होटलबीच भारतको राजधानी नयाँ दिल्लीमा औपचारिक सम्झौता मे १४ मा सम्पन्न भइसकेको छ। यो सम्झौतासँगै बुढानिलकण्ठको उक्त होटल अब ‘Tribe Kathmandu’ को नामबाट सञ्चालन हुनेछ, जुन ट्राइब ब्रान्डको दक्षिण एसियाकै पहिलो प्रोजेक्ट हो। हाल पाँचतारे होटलको रूपमा अपग्रेड भइरहेको यस होटलमा आधुनिक यात्रु र विशेष गरी युवा पुस्तालाई लक्षित गरी स्मार्ट डिजाइन र जीवन्त सामाजिक स्पेस प्रदान गरिनेछ।