चर्चित ‘Pam the Bird’ फेरि चर्चामा, १४० मिटर अग्लो पुलमा चढेर कलाकारले मागे कर घटाउन र पिनट बटर स्यान्डविच

अष्ट्रेलियाको मेलबर्नस्थित Bolte Bridge मा एक २२ वर्षीय ग्राफिटी कलाकारले १४० मिटर अग्लो टावरमा चढेर विशाल "Pam the Bird" चित्र बनाएका छन्। त्यसपछि उनी करिब ९ घण्टासम्म पुलको टुप्पोमै बसेपछि ठूलो प्रहरी अपरेशन सञ्चालन गरिएको थियो।

प्रहरीका अनुसार ती युवक ज्याक गिब्सन बरेल हुन्। उनले सामाजिक सञ्जालमा प्रत्यक्ष प्रसारण गर्दै "सरकारले कर घटाएपछि मात्र तल झर्छु" भन्दै माग राखेका थिए। उनले ड्रोनमार्फत पिनट बटर र जाम स्यान्डविच, दूध र कम्बल समेत पठाइदिन आग्रह गरेका थिए। तर अन्ततः कुनै स्यान्डविच नआएपछि उनी स्वयं तल झरे र प्रहरीले पक्राउ गर्यो।