सीमा, सार्वभौमिकता र कूटनीति

पश्चिम नवलपरासीको सुस्ता क्षेत्रमा भारतीय सीमा सुरक्षा बल (एसएसबी) का सदस्यहरू नेपाली भूभागतर्फ प्रवेश गरेको आरोप र त्यसपछि स्थानीयवासीको विरोधले फेरि एकपटक नेपाल–भारत सीमाको प्रश्नलाई राष्ट्रिय बहसको केन्द्रमा ल्याइदिएको छ ।

सुस्तामा देखिएको तनावले एउटा गहिरो यथार्थलाई पुनः उजागर गरेको छ– नेपाल–भारत सीमाको प्रश्न केवल सीमास्तम्भ, नक्सा वा भूगोलको विषय मात्र होइन; यो सार्वभौमिकता, कूटनीतिक विश्वास, आर्थिक परनिर्भरता र राज्यको वास्तविक क्षमताको प्रश्न पनि हो ।