बाढीप्रभावित क्षेत्रमा सञ्चार जोड्न एनसेलको स्याटलाइट इन्टरनेट: नुवाकोटका तीन स्थानमा सेवा सुरु

काठमाडौँ। भोटेकोशी नदीमा आएको बाढीबाट प्रभावित क्षेत्रमा जारी खोज, उद्धार तथा राहत कार्यलाई सहज बनाउन एनसेलले स्याटलाइट प्रविधिमा आधारित इन्टरनेट सेवा उपलब्ध गराउन थालेको छ। आपत्कालीन अवस्थामा सञ्चार सञ्जाल अवरुद्ध हुँदासमेत सम्पर्कविच्छेद नहोस् भन्ने उद्देश्यले कम्पनीले युटेलस्याटको ‘लो अर्थ अर्बिट’ (LEO) स्याटलाइट प्रविधिमार्फत इन्टरनेट सेवा सुरु गरेको हो।

उद्धार, राहत र पुनर्स्थापना कार्यमा संलग्न सरकारी निकायहरूसँगको समन्वयमा एनसेलले आवश्यक स्थानहरू पहिचान गरी उपकरण जडान गरिरहेको छ। यसै क्रममा सडक तथा सञ्चार पूर्वाधार गम्भीररूपमा प्रभावित भएको नुवाकोटका तीन महत्त्वपूर्ण स्थानमा सेवा सञ्चालनमा आइसकेको छ भने अन्य बाढीप्रभावित क्षेत्रहरूमा जडान कार्य जारी छ। बाढीप्रभावित समुदाय, होल्डिङ सेन्टर, राहत वितरण केन्द्र, अस्थायी शिविर र आपत्कालीन कार्यस्थलमा यो प्रविधिमार्फत हाल निःशुल्क इन्टरनेट सेवा प्रदान गरिएको छ।