गोठमा लुकाएर राखिएको ४ थान सालको गोलिया बरामद

बारा । डिभिजन वन कार्यालय बाराले कोल्हवी नगरपालिका–५, सखुईस्थित एक स्थानीयको गोठबाट चार थान सालको गोलिया बरामद गरेको छ । विशेष सूचनाका आधारमा तामागढी सब–डिभिजन वन कार्यालयबाट खटिएको वन रक्षक, वन कर्मचारी र सशस्त्र प्रहरीको संयुक्त टोलीले बुधबार ‘ए ग्रेड’ को सालको गोलिया बरामद गरेको हो ।

तामागढी सब–डिभिजन वन कार्यालयका प्रमुख कृष्ण पटेलका अनुसार चोरी गरी लुकाएर राखिएको काठ नियन्त्रणमा लिने क्रममा स्थानीयवासीले करिब दुई घण्टासम्म टोलीलाई अवरोध पुर्‍याएका थिए । काठ लुकाएर राख्ने घरधनीको नाम स्थानीयले नखुलाएका कारण हाल उनको पहिचान हुन बाँकी रहेको र यस सम्बन्धमा थप अनुसन्धान भइरहेको प्रमुख पटेलले जानकारी दिए ।