परराष्ट्र सेवालाई आर्थिक कूटनीति र संस्थागत सुधारमा केन्द्रित गर्नुपर्छ: परराष्ट्रमन्त्री खनाल

परराष्ट्रमन्त्री शिशिर खनालले नेपालको परराष्ट्र सेवालाई समयसापेक्ष परिमार्जन गर्दै आर्थिक कूटनीतिमा केन्द्रित गर्नुपर्नेमा जोड दिनुभएको छ । आइतबार परराष्ट्र सेवा दिवसका अवसरमा आयोजित विशेष समारोहलाई सम्बोधन गर्दै मन्त्री खनालले परराष्ट्र मन्त्रालय र वैदेशिक नियोगलाई परिणाममुखी बनाउनुपर्ने बताउनुभएको हो ।

मन्त्री खनालले सीमित स्रोत र साधनका बाबजुद राष्ट्रिय सार्वभौमसत्ता र हितको रक्षा गर्न पूर्वप्रशासक एवं कूटनीतिज्ञले निर्वाह गरेको भूमिका प्रशंसनीय रहेको बताउनुभयो । परराष्ट्र नीति आन्तरिक प्राथमिकताको प्रतिबिम्ब हुनुपर्ने उल्लेख गर्दै उहाँले विश्व भू–राजनीतिमा भइरहेको तीव्र परिवर्तन, जलवायु सङ्कट र प्रविधिको विकासले निम्त्याएका चुनौतीहरूको सामना गर्न कूटनीतिक चातुर्य र रणनीतिक दूरदर्शिता आवश्यक रहेको औँल्याउनुभयो । नेपालले विश्व परिवेशमा हुने परिवर्तनहरूको केवल प्रतिक्रिया मात्र नजनाई, तिनको पूर्वअनुमान गरी राष्ट्रिय हितमा उपयोग गर्नुपर्नेमा उहाँको जोड थियो ।