बालोन डी’ओर २०२६: मेस्सी मनोनयनमा पर्दा रोनाल्डो आउट, युरोप बाहिरका खेलाडीको इन्ट्री

फ्रेन्च फुटबलले मंगलबार सार्वजनिक गरेको बालोन डी’ओर २०२६ को ३० सदस्यीय अन्तिम मनोनयनमा अर्जेन्टिनी स्टार लियोनल मेस्सी पर्न सफल हुँदा उनका चिरपरिचित प्रतिद्वन्द्वी क्रिस्टियानो रोनाल्डो भने बाहिरिएका छन्।

यसपटकको मनोनयनले फुटबलको परम्परागत युरोपेली दबदबालाई स्पष्ट रुपमा तोडेको छ। अमेरिकाको इन्टर मियामीबाट खेलिरहेका मेस्सीसँगै साउदी अरेबियामा रहेका साडियो माने (अल नासर) र जुलियन क्विनोन्स (अल कादसियाह) जस्ता युरोप बाहिरका लिग खेल्ने खेलाडीले पनि फुटबलको यस प्रतिष्ठित व्यक्तिगत पुरस्कारको सूचीमा स्थान बनाएका छन्। आगामी अक्टोबर २६ तारिखमा लन्डनमा आयोजना हुने घोषणा समारोहअघि सार्वजनिक सूचीमा वर्तमान पुस्ताका स्टारहरु किलियन एमबाप्पे, जुड बेलिङघम, एर्लिङ हालान्ड, लामिन यामाल र भिनिसियस जुनियरको उपस्थिति बलियो छ।