बदलिँदो विश्व परिवेशमा आर्थिक कूटनीतिलाई प्रमुख प्राथमिकता दिनुपर्छ: परराष्ट्र सचिव राई [भिडियो]

काठमाडौँ । परराष्ट्र सचिव अमृतबहादुर राईले बदलिँदो विश्व परिवेशमा नेपालको परराष्ट्र सम्बन्धलाई परम्परागत राजनीतिक दायराबाट माथि उठाउँदै आर्थिक कूटनीतिलाई प्रमुख प्राथमिकता दिनुपर्नेमा जोड दिएका छन्। परराष्ट्र सेवा दिवसका अवसरमा आइतबार आयोजित विशेष कार्यक्रमलाई सम्बोधन गर्दै उनले राष्ट्रिय हित र समृद्धिका लागि आर्थिक र सार्वजनिक कूटनीतिको भूमिका महत्त्वपूर्ण हुने स्पष्ट पारे।

अबको कूटनीतिको केन्द्रमा वैदेशिक लगानी आकर्षण, व्यापार प्रवर्द्धन, पर्यटन विस्तार, प्रविधि हस्तान्तरण र उद्यमशीलतालाई राख्नुपर्ने आवश्यकता उनले औँल्याए। आजको युगमा कूटनीति केवल राजनीतिक भेटघाटमा मात्र सीमित नरहेको र विभिन्न राष्ट्रहरूबिच लगानी तथा प्रविधिका लागि प्रतिस्पर्धा भइरहेकाले नेपालले पनि आफ्ना कूटनीतिक प्रयासहरूलाई राष्ट्रिय विकास र आर्थिक अवसर सिर्जनामा केन्द्रित गर्नुपर्ने उनको भनाइ थियो।