सामाजिक सञ्जालमा भिडियो हेरेर ‘ग्याङ फाइट’ मा संलग्नलाई पक्राउ

सामाजिक सञ्जालमा ‘ग्याङ फाइट’ भएको भिडियो देखेपछि खटिएको प्रहरी टोलीले झै–झगडामा संलग्न ६ जनालाई पक्राउ गरेको छ। पोखरा महानगरपालिका–२ स्थित बागलुङ बसपार्कमा ग्याङ फाइट गरेका उनीहरुलाई प्रहरीले पक्राउ गरेको हो। लागुऔषध कारोबारका कारण ग्याङ फाइट भएको प्रहरीले बताएको छ।

कास्की प्रहरी प्रवक्ता डिएसपी हरिबहादुर बस्नेतका अनुसार वैशाख २२ गते राति करिब साढे नौ बजेको समयमा भएको उक्त झगडाको भिडियो सामाजिक संजालमा भाइरल भएपछि जिल्ला प्रहरी कार्यालय कास्की र त्यस अन्तर्गतको वडा प्रहरी कार्यालय बगरबाट प्रहरी टोली खटिएको थियो। त्यही टोलीले उनीहरुलाई नियन्त्रणमा लिएको हो। प्रहरीका अनुसार झगडामा संलग्न उनीहरुलाई बाझापाटन र बसपार्क क्षेत्रबाटै नियन्त्रणमा लिएको थियो।