बालबालिकालाई सामाजिक सञ्जालबाट टाढा राख्ने ईयुको तयारी, उमेर सीमा तोकिँदै

काठमाडौं । बालबालिकालाई सामाजिक सञ्जालबाट उत्पन्न हुने जोखिमबाट जोगाउन युरोपेली सङ्घ (ईयु) ले नाबालिगको सामाजिक सञ्जाल प्रयोगमा उमेर सीमा तोक्ने तयारी गरेको छ । तर प्रस्तावित प्रतिबन्धले बालबालिकाको अभिव्यक्ति स्वतन्त्रता, सूचनामा पहुँच र डिजिटल गोपनीयताको अधिकार प्रभावित हुन सक्ने भन्दै बाल अधिकार तथा डिजिटल अधिकारका पक्षधरले आलोचना गरेका छन् ।

ईयुकी प्रमुख उर्सुला भोन डेर लेयनले आगामी साता युरोपेली संसद्मा नाबालिगको सामाजिक सञ्जाल प्रयोगलाई सीमित गर्ने योजनाको खाका प्रस्तुत गर्ने तयारी गरेकी छन् । ईयुले १३ वर्षभन्दा कम उमेरका बालबालिकालाई सामाजिक सञ्जाल प्रयोगमा रोक लगाउनेदेखि १५ वर्षभन्दा कम उमेरका प्रयोगकर्तामाथि प्रतिबन्ध लगाउनेसम्मका विकल्पमाथि छलफल गरिरहेको छ ।