कोरला नाकाः गाडी, फलफूल, लत्ताकपडादेखि बेलीब्रिजसम्म ल्याँइदै

लामो समयदेखि उपेक्षामा पर्दै आएको मुस्ताङको कोरला नाकास्थित भन्सार कार्यालय आजकल निकै नै व्यस्त छ। सीमित श्रोतसाधनका बाबजुत अहिलेको समयमा नेपाललाई चीनसँग जोड्ने व्यापारिक नाकाको एकमात्र विकल्पको रुपमा कोरला बनेको छ। त्यही नाका हुँदै अहिले दिनहुँजसो ठूला आकारका कन्टेनर नेपाल भित्रिरहेका छन्।

मुस्ताङ भन्सार कार्यालयका अनुसार अहिले चीनबाट नेपालमा सामान र साधन भित्र्याउने एकमात्र नाका कोरला बनेको छ। मुस्ताङ भन्सार कार्यालयका प्रमुख बिदुर चुडालका अनुसार रसुवागढी नाका बाढीले ध्वस्त पारेपछि चीनले तातोपानी नाका पनि अस्थायी रुपमा बन्द गरेको थियो। रसुवागढी नाका बाढीले ध्वस्त बनाएपछि त्यहाँको नाकामा रोकिएका र तातोपानी बन्द गरिएपछि रोकिएका कन्टेनरका सामान अहिले धमाधम कोरला नाका हुँदै नेपाल भित्र्याउन थालिएको छ।