मीनबहादुर-एमाले 'भवन काण्ड' समाप्त, एमालेले धन्यवादसहित दान फिर्ता गर्‍यो

काठमाडौं : एमालेले मीनबहादुर गुरुङबाट व्यावसायिक दानमा प्राप्त गर्न लागेको विवादित भवन र जग्गा फिर्ता गरेर बल्खुमै कार्यालय भवन बनाउने निर्णय गरेको छ। एमाले उपमहासचिव लेखराज भट्टले कलंकीमा भवन निर्माणको प्रस्ताव गर्ने दाता मीनबहादुर गुरुङ दम्पत्तिलाई धन्यवाद सहित प्रस्ताव फिर्ता गर्ने र नयाँ कार्यालय भवन मदननगर बल्खुमै निर्माण गर्ने निर्णय भएको जानकारी दिए।

भूकम्पबाट बल्खुमा रहेको भवन बस्न लायक समेत नभएपछि एमालेले विभिन्न ठाउँमा भाडामा भवन लिएर कार्यालय चलाउँदै आएको छ। एमालेको आधुनिक भवन बनाएर दिन गुरुङले जग्गा दान दिने बताउँदै २०८१ असोजमा एमाले अध्यक्ष केपी शर्मा ओली र गुरुङ दम्पतीले भवन शिल्यान्यास गरेका थिए।