ढिँडोको पुनरागमन

पोखरा। लमजुङको मर्स्याङ्दी गाउँपालिका-६ का गुरुङ चलचित्रका अभिनेता विष्णु गुरुङलाई घरमा पाहुना आउँदा ढिँडो लुकाएर हतारहतार भात पकाउने गरिएको सम्झना अझै छ। “हामी बिहान-बेलुका ढिँडो नै खाएर हुर्कियौँ। त्यसबेला यसलाई गरिबको खाना भनेर हेपिन्थ्यो,” गुरुङ भन्छन्, “समयमा कति ठूलो परिवर्तन आयो। अहिले त्यही ढिँडो खोजीखोजी खान्छन्।”

“पहिले ढिँडो खानु बाध्यता थियो, अहिले रहर बनेको छ। गाउँमा धानको उत्पादन कम हुने समयमा बिहान-बेलुका ढिँडोकै भर पर्नुपर्थ्यो,” लमजुङको दोर्दी गाउँपालिका-९ का वडाध्यक्ष आशिष तामाङ भन्छन्, “त्यतिबेला खानै मन नलाग्ने परिकार अहिले महँगो मूल्य तिरेर खानुपर्ने अवस्था आएको छ।”