बजेट संशोधनको बाचा गरेको कोशी सरकारले साउनमै ‘रातो किताब’ सच्याउन सक्ला ?

विराटनगर । कोशी प्रदेश सरकारले आगामी आर्थिक वर्ष (२०८३/०८४) का लागि ल्याएको ४० अर्ब ४४ करोड ९८ लाख रुपैयाँ बराबरको अनुमानित बजेट प्रदेश सभाबाट पारित भएको छ । बजेट पारित हुनुभन्दा अगाडिको राजनीतिक द्वन्द्व र त्यसपछि साउन तेस्रो साताभित्रै बजेट सच्याउने सरकारको बाचा भने अझै सेलाएको छैन ।

बजेट पारित गराउन सरकारले असन्तुष्ट सांसदहरूलाई फकाउँदै साउनको तेस्रो हप्ताभित्र करिब १ अर्ब रुपैयाँ बराबरका योजनाहरू स्थगित गरी नयाँ योजना समावेश गर्ने प्रतिबद्धता जनाएको छ । यसरी पारित बजेटको रातो किताब आर्थिक वर्षको सुरुवातमै संशोधन गर्न कानुनी रूपमा सम्भव नहुने विपक्षी दलको तर्क छ ।