अख्तियारका प्रमुख आयुक्त प्रेमकुमार राईको नाम विभिन्न काण्डमा किन जोडिन्छ ?

काठमाडौँ । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राई विभिन्न प्रकरणमा मुछिँदै आइरहे पनि न्यायिक प्रक्रिया सामना गर्नबाट जोगिँदै आएका छन् । वाइडबडी प्रकरण, आयल निगमको जग्गा प्रकरण होस् या भैरहवाको विमानस्थल जग्गा प्रकरणदेखि नक्कली भुटानी शरणार्थी प्रकरणमा प्रमुख आयुक्त प्रेमकुमार राईको नाम जोडिएको छ ।

उनी संस्कृति, पर्यटन तथा नागरिक उडड्यन मन्त्रालय र गृह मन्त्रालयको सचिव हुँदा भएका विभिन्न निर्णयका कारण उनको नाम यी प्रकरणमा जोडिन पुगेका हुन् । सचिव हुँदा उनैले गरेको निर्णयको विषयलाई लिएर अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दर्ता गर्‍यो, तर संयोग, उनै नेतृत्वको अख्तियार दुरुपयोग अनुसन्धान आयोगले तत्कालीन सचिवको हैसियतमा उनले गरेको निर्णयलाई भने अनदेखा गरेको छ ।