लुम्बिनी प्रदेशमा मन्त्री फेरबदल गर्ने तयारीमा कांग्रेस-एमाले गठबन्धन

काठमाडौं । लुम्बिनी प्रदेश सरकारमा मन्त्रीहरु फेरबदल गर्न तयारीमा सत्तारुढ दल नेकपा एमाले र नेपाली कांग्रेस रहेका छन् । बजेटअघि मुख्यमन्त्री चेतनारायण आचार्यलाई यथावत राखेर सबै मन्त्री फेरबदल गर्ने विषयमा सहमति गर्दै दुवै दलका प्रदेश नेताहरु तथा सबै सांसदहरु देउखुरीमा जुटेका छन् ।

आज नै प्रदेश सरकारले आफ्नो वार्षिक नीति तथा कार्यक्रम ल्याउने तयारी गरी छ । त्यस लगत्तै मन्त्रिमण्डल पुनःगठन गर्ने समझदारी दुई दलले गरेका हुन् । मन्त्री फेर्ने सहमतिमा पुगेपछि नीति तथा कार्यक्रम अघि गर्ने कि पछि गर्ने भन्ने विषयमा आइतबार दिनभर अन्यौलमा पुगेका थिए । दुवै दलले मुख्यमन्त्री पाउने दलले ३ मन्त्री र अर्कोले ४ मन्त्री पाउनेगरी समझदारी गरेका हुन् । अहिलेको समझदारीअनुसार कांग्रेसबाट ४ मन्त्री बन्नेछन् भने एमालेबाट ३ मन्त्री बन्नेछन् ।