अदालतको फैसला कार्यान्वयन न्यायालयको एक्लो प्रयासबाट मात्रै सम्भव छैन : मुख्य  रजिस्ट्रार पौडेल

काठमाडौँ । सर्वोच्च अदालतका मुख्य रजिस्ट्रार विमल पौडेलले फैसला कार्यान्वयनको विषय न्यायालयको एक्लो प्रयासमा मात्रै सम्भव नहुने बताएका छन् । फैसला कार्यान्वयनसँग सम्बन्धित महत्त्वपूर्ण कानुनहरूको सँगालो पुस्तक विमोचनका क्रममा मुख्य रजिस्टार पौडेलले फैसला कार्यान्वयन गर्नका लागि न्यायालयसँगै प्रहरी,मालपोत स्थानीय तह, फैसलासँग जोडिएका सम्बन्धित सरोकारवाला निकाय पनि जागरूक हुन जरुरी भएको बताए ।

त्यस्तै न्यायपालिकाको फैसला कार्यान्वयन प्रक्रियालाई थप सुदृढ, प्रविधिमैत्री र प्रभावकारी बनाउनुपर्नेमा जोड दिए । कार्यक्रममा बोल्दै मुख्य रजिस्टार पौडेलले फैसला कार्यान्वयन निर्देशनालयले चालेका कदमहरूको प्रशंसा गरे । उनले अहिलेको डिजिटल युगमा फैसला कार्यान्वयनका तथ्याङ्कहरूलाई व्यवस्थित गर्न सफ्टवेयर पद्धतिको अपग्रेडेशन अपरिहार्य रहेको बताए ।