किन घट्दै छन् कक्षाकोठा र विद्यार्थी?

विद्यालयीय शिक्षा बालबालिकाको भविष्य निर्माणको आधारशिला हो। विद्यालय तथा विद्यार्थीको संख्या वृद्धिसँगै शिक्षामा गुणस्तरीयताका सूचक पनि निरन्तर बढ्दै जानु शिक्षा सुधारका सकारात्मक संकेत हुन् तर पछिल्लो पाँच वर्षको अवधिमा देशभर दुई हजारभन्दा बढी सामुदायिक विद्यालयको संख्या घट्नुले नेपालको जनसंख्या, बसाइँसराइ, सार्वजनिक शिक्षाप्रतिको विश्वास र शैक्षिक नीतिको गहिरो संकटलाई उजागर गरेको छ।

पछिल्लो पाँच वर्षमा सामुदायिक विद्यालयको संख्या २७ हजार आठ सय १३ बाट घटेर २५ हजार ६ सय २३ मा झरेको छ। अर्थात् पाँच वर्षमै दुई हजार एक सय ९० विद्यालय अभिलेखबाट घटेका छन्। यसबिच करिब आठ सय विद्यालय मर्ज वा समायोजनको प्रक्रियामा परिसकेका छन्। हालैको भोटेकोसी बाढीजस्ता विपद्ले समेत आगामी दिनमा विद्यालय बन्द, मर्ज र समायोजनको संख्या अझ बढ्न सक्ने संकेत गरेका छन्।