इतिहास रच्ने लक्ष्यमा उज्बेकिस्तान

‘ह्वाइट वुल्भ्स’ अर्थात् एसियाली राष्ट्र उज्बेकिस्तान जो यसपल्ट उत्तरी अमेरिकी भूमि मेक्सिको सिटीमा इतिहास रच्ने लक्ष्यमा छ। विश्व फुटबलको सबैभन्दा उचो स्तरमा पहिलोपल्ट पुगेर उज्बेकिस्तानले इतिहास बनाइसकेको छ।

अब यो मञ्चमा अर्को इतिहास रच्ने दाउमा छ, ह्वाइट वुल्भ्स। मेक्सिको सिटीमा लामो प्रतीक्षापछि डेब्युका लागि मैदान उत्रँदा उज्बेकिस्तानका खेलाडीका लागि अर्को फुटबल खेल मात्र हुने छैन। त्यो दशकौको प्रतीक्षा, संघर्ष र सपनाको साकार रूप हुनेछ। मेक्सिको सिटीस्थित ऐतिहासिक एज्टेका रंगशाला, जहाँ उज्बेकिस्तानका लागि इतिहास रच्ने अवसर मिल्नेछ। तर, त्यसका लागि उसले दक्षिण अमेरिकाको बलियो राष्ट्र कोलम्बियालाई पार गर्नुपर्नेछ। समूह ‘के’ को उक्त खेल बिहीबार बिहान ७ः४५ बजे हुनेछ। यस समूहमा डिआर कङ्गो र पोर्चुगलजस्तो दाबेदार राष्ट्र पनि छन्। यो समूहबाट डेब्युमा नै नकआउट चरण पुग्न उज्बेकिस्तानका लागि सहजै हुने छैन। तर, उसले एएफसी छनोटमा उत्कृष्ट गरेको थियो।