रासायनिक मलमा सधैं झमेला

बाँकेको राप्ती सोनारी गाउँपालिका–७ स्थित बर्खे खेतीका लागि शिवशक्ति कृषि सहकारी संस्थासँग साढे ६ सयभन्दा बढी किसानले रासायनिक मल मागेका छन्। मागअनुसार बाँड्ने हो भने एक किसानलाई सरदरमा तीन बोराजति मल दिनुपर्छ। सो सहकारीले ६८ बोरा (५० किलो) युरिया र १५ बोरा मात्रै डिएपी मल पाएको छ।

सहकारीलाई मल उपलब्ध गराउन गाउँपालिकाले कोटा निर्धारण गरिदिएको थियो। कोटाअनुसार प्राप्त मल लिएर किसानलाई बाँड्ने सहकारीको योजना छ। तर धेरै परिमाणको मल मागेका किसानलाई कसरी बाँड्ने भन्नेमा सहकारी संस्था अन्योलमा छ। कृषि सामग्रीबाट प्राप्त मल सबै किसानलाई समान रूपले बाँड्ने हो भने प्रतिव्यक्ति १० देखि १५ किलो भागमा पर्ने अवस्था रहेको सहकारी संस्थाका पदाधिकारी बताउँछन्।