पोखरामा बाढीपीडितको शव व्यवस्थापनमा सकस

पोखरामा बाढीपीडितको शव व्यवस्थापन गर्न सकस भएको छ। क्षमताभन्दा बढी शव पोखरा पठाइएपछि शव व्यवस्थापनमा हम्मेहम्मे परेको हो। पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पतालको शवगृहमा ७२ जनासम्मको शव राख्न सक्ने क्षमता छ। भोटेकोशी बाढीका कारण मृत्यु भएका १०२ वटा शव पोखरा ल्याइएको छ।

भदौ १० गते ९ वटा र भदौ ११ गते ९१ वटा गरी कुल १०२ वटा शव पोखरा आइपुगेको जिल्ला प्रशासन कार्यालय कास्कीका सहायक प्रमुख जिल्ला अधिकारी चित्राङ्गद बरालले जानकारी दिए। उनका अनुसार पोखरामा तनहुँबाट २३ वटा, गोरखाबाट ११ वटा, नवलपरासी पूर्वबाट ४१ वटा र धादिङबाट २७ वटा शव ल्याइएको हो। पोखरा ल्याइएका शवहरू पश्चिमाञ्चल क्षेत्रीय अस्पतालमा राखिएका छन्।