पोखरा बसपार्कमा महानगरको डोजर: खाली टहरा भत्काइए, सुकुम्बासी बस्तीमा तत्काल नचल्ने

पोखरा महानगरपालिकाले पोखरा बसपार्क क्षेत्रभित्रका टहरा भत्काउन सुरु गरेको छ । पोखरा बसपार्क क्षेत्रभित्र पर्ने ठाउँमा बनाइएका संरचना महानगरले बिहीबार डोजर लगाएर भत्काएको हो ।

महानगरले दिएको समयसीमा सकिएपछि बिहीबार महानगर टहरा भत्काउन ३ वटा डोजर लिएर पुगेको थियो । ती डोजरले बसपार्कको उत्तरी क्षेत्र पृथ्वी राजमार्गसँगै जोडिएको क्षेत्र र दक्षिणी क्षेत्र (सुकुम्बासी बस्तीभन्दा पश्चिमतर्फको भाग) मा रहेका घरटहरा भत्काएको छ । भत्काइएका घरटहरा व्यक्तिको लालपुर्जा भएका जग्गामा बनेका हुन् । यद्यपि, सो जग्गा बसपार्कभित्रै पर्छ ।