ट्राफिक प्रहरीले भन्यो : गणेश नेपालीलाई ट्राफिक जरिवाना गरिएको छैन

काठमाडौं । काठमाडौं उपत्यका ट्राफिक प्रहरी कार्यालयले गणेश नेपालीले गरेको आत्मदाह प्रयासको घटनालाई ट्राफिक कारबाहीसँग जोडेर सार्वजनिक गरिएका समाचार तथा सामाजिक सञ्जालका सामग्री तथ्यमा आधारित नभएको जनाएको छ।

कार्यालयले शुक्रबार जारी गरेको विज्ञप्तिमा गणेश नेपालीलाई ट्राफिक प्रहरीले कुनै जरिबाना नगरेको स्पष्ट पार्दै घटनालाई ट्राफिक कारबाहीको परिणामका रूपमा प्रस्तुत गर्नु भ्रामक भएको उल्लेख गरेको छ। प्रारम्भिक अनुसन्धानबाट पनि ट्राफिक प्रहरीले जरिबाना गरेको वा उक्त घटनासँग ट्राफिक कारबाहीको प्रत्यक्ष सम्बन्ध रहेको पुष्टि नभएको कार्यालयको दाबी छ।