मधेस लागुपदार्थको दलदलमा

नेपाल–भारत खुला सीमाको दुरुपयोग गर्दै हुने लागुऔषध तस्करी नियन्त्रण गर्न मधेस प्रदेश प्रहरीका लागि गम्भीर सुरक्षा चुनौती बनेको छ। सीमावर्ती भारतबाट ब्राउन सुगर, ट्रामाडोल, कोरेक्स लगायत विभिन्न किसिमका प्रतिबन्धित औषधी र नेपालबाट गाँजा, चरेसको अवैध कारोबार गर्न सीमापार सक्रिय गिरोहको संलग्नता बढ्दै गएपछि मधेस प्रदेश प्रहरीले असारको पहिलो सातादेखि नै ‘जिरो टोलरेन्स’ रणनीति अपनाउँदै आक्रामक नियन्त्रण अभियान सञ्चालन गरेको पाइएको छ।

प्रहरीले पछिल्ला दुई सातामा सिरहा, महोत्तरी र पर्सा जिल्लामा भएका चार ठुला कारबाहीले लागुऔषध तस्करीको सञ्जाल कति संगठित र हिंसात्मक बन्दै गएको छ भन्ने स्पष्ट भएको छ। लागुऔषध कारोबारी पक्राउबाट बच्न प्रहरीमाथि नै गोली प्रहार गर्नेसम्मको दुस्साहस देखाउन थालेपछि प्रहरीले पनि कानुनअनुसार बल प्रयोग गर्दै नियन्त्रण अभियानलाई थप कडा पारेको छ। दुई सातामै ६२ जना कारोबारी पक्राउ गरी उनीहरूका साथबाट सयौं किलो गाँजा, ब्राउन सुगर र १ लाख २० हजारभन्दा बढी ट्रामाडोल बरामद गरेका छन्।