गणेश नेपाली घटनाको निष्पक्ष अनुसन्धान गर्न युवा संघको माग

राष्ट्रिय युवा संघ नेपालले आत्मदाहको प्रयास गरेका गणेश नेपालीको घटनाप्रति चिन्ता व्यक्त गर्दै निष्पक्ष छानबिन गर्न सरकारसँग माग गरेको छ । संघका अध्यक्ष महाराज गुरुङले विज्ञप्ति जारी गर्दै घटनाकाे निष्पक्ष छानबिन गर्न माग गरेका हुन् ।

‘राष्ट्रिय युवा संघ नेपाल घाइते गणेश नेपालीको शीघ्र स्वास्थ्यलाभको कामना गर्दछ । साथै घटनाको यथार्थ छानबिन गरी युवालाई यस्तो अवस्थामा पुऱ्याउने कारणहरूको निष्पक्ष अनुसन्धान गरी सार्वजनिक गर्न सम्बन्धित निकायसँग माग गर्नुका साथै घाइतेको सम्पूर्ण उपचारको जिम्मेवारी र क्षतिपूर्ति राज्यले वहन गर्न जोडदार माग गर्दछ,’ विज्ञप्तिमा भनिएकाे छ ।