गणेश नेपालीको जीवन रक्षाका लागि कसर बाँकी नराख्न लेखा समिति सभापतिको आग्रह

काठमाडौँ । सार्वजनिक लेखा समितिका सभापति भरतबहादुर खड्काले त्रिपुरेश्वरमा आत्मदाहको प्रयास गरेका मुगुका २५ वर्षीय गणेश नेपालीको जीवन रक्षाका लागि आफ्नो सम्पूर्ण शक्ति परिचालन गर्न सरकारसँग जोडदार माग गरेका छन्। शुक्रबार सिंहदरबारमा सञ्चारकर्मीहरूसँग कुरा गर्दै सभापति खड्काले वीर अस्पतालमा जटिल अवस्थामा उपचाररत नेपालीको जीवन बचाउने मुख्य दायित्व राज्यको भएको बताए।

सभापति खड्काले बिहीबार त्रिपुरेश्वरस्थित राहदानी विभाग अगाडि घटेको उक्त घटनालाई अत्यन्तै दर्दनाक र पीडादायी भन्दै नेपालमा सम्भव नभए विदेशमा लगेर भए पनि उनको उपचार गरिनुपर्ने बताए। 'उहाँ अत्यन्तै क्रिटिकल पोजिसनमा हुनुहुन्छ। राज्यले उनलाई बचाउनका लागि जुनसुकै कुरामा पनि ध्यान दिनुपर्छ,' उनले भने, 'जुनसुकै देशमा लगेर भए पनि बचाउनुपर्ने अवस्था आयो भने पनि नागरिकलाई बचाउने राज्यको दायित्व हो। यसमा सरकारले कुनै पनि कसर बाँकी राख्नु हुँदैन।'