निष्ठा र नियतिका घाउ !

‘जेन जी’ आन्दोलनपछि देशमा निर्वाचनको घोषणा भइसकेको थियो । चुनाव आउन केही दिनमात्र बाँकी थियो । म काभ्रे जिल्लाको मेरो घरमा थिएँ । अपराह्नतिर मलाई भेट्न मैले पढेको तत्कालीन प्राथमिक विद्यालयका एक जना आदरणीय शिक्षक लौरो टेक्दै मेरो घरमै आइपुग्नुभयो ।

पहिला सरको व्यक्तित्व सिनेमाको नायकजस्तै थियो, साथै निडर, बौद्धिक र प्रतिभावान पनि मानिनुहुन्थ्यो । अनुशासनको मामिलामा भने निकै कडा हुनुहुन्थ्यो, त्यसैले पढाइमा मन नलगाउने विद्यार्थीहरूले उहाँलाई मन पराउँदैनथे ।