पूर्वाधार नयाँ रणनीति: ११ खर्बको ठेक्का लगाउने तयारी

सरकारले पूर्वाधार निर्माणमा नयाँ रणनीति बनाएको छ। आगामी आर्थिक वर्ष २०८३/८४ का लागि सडक पूर्वाधार तथा सहरी पूर्वाधारमा दुई खर्ब ८६ अर्ब ४८ करोड रुपैयाँ बजेट विनियोजन गरेको छ तर सरकारले पूर्वाधार निर्माणमा नयाँ रणनीति अपनाउँदै सहरी तथा सडक निर्माणका लागि करिब साढे ११ खर्ब रुपैयाँको ठेक्का लगाउने तयारी गरेको छ। हरेक वर्ष ठेक्का लगाउँदा आधा समय प्रक्रियामै जाने र काम गर्न समय अपुग हुने भएकाले तीन वर्षको योजनासहित ठेक्काको तयारी गरेको पूर्वाधार विकास मन्त्रालयले जनाएको छ।

भौतिक पूर्वाधारतर्फ करिब पाँच खर्ब रुपैयाँ, सहरी पूर्वाधारतर्फ करिब ६ खर्ब ५० अर्ब रुपैयाँ बराबरका आयोजना कार्यान्वयनमा लैजाने तयारी गरेको पूर्वाधार विकासमन्त्री सुनिल लम्सालले बताए। ‘बजेट पुस्तिकामा वार्षिक रूपमा रकम कम देखिए पनि योजनाको समग्र आकार निकै ठुलो छ,’ बिहीबार संसद्मा मन्त्री लम्सालले भने, ‘तीन वर्षभित्र ११ खर्ब ५० अर्बका योजना कार्यान्वयनमा लैजान्छौं।’