ग्यालेक्सी फोरकेलाई काठमाडौं महानगरको अन्तिम चेतावनी, १५ दिनभित्र भाडा तिर्न र सामान हटाउन निर्देशन

काठमाडौं- काठमाडौं महानगरपालिकाले गोरखा मिडिया नेटवर्क प्रालिलाई १५ दिनभित्र बक्यौता भाडा तिर्न तथा ग्यालेक्सी फोरके टेलिभिजनसँग सम्बन्धित सरसामान हटाउन अन्तिम सूचना जारी गरेको छ । तोकिएको अवधिभित्र सामान नहटाइए कानुनअनुसार लिलाम प्रक्रिया अघि बढाइने महानगरले जनाएको छ ।

महानगरपालिकाको कानुन तथा मानव अधिकार विभागले मंगलबार सूचना जारी गर्दै वडा नम्बर ३ बालुवाटारस्थित मृगेन्द्रप्रसाद मिश्रको घरमा सञ्चालन हुँदै आएको ग्यालेक्सी फोरके टेलिभिजनले लामो समयदेखि घरभाडा नतिरेको उल्लेख गरेको हो ।