पानीजन्य जोखिमबारे सचेतनाका कार्यक्रम बढाउन सांसद गजुरेलको आग्रह

काठमाडौँ- राष्ट्रिय स्वतन्त्र पार्टी (रास्वपा)का सांसद आशिष गजुरेलले पानीजन्य जोखिममा बर्सेनि थुप्रै युवा र बालबालिकाको ज्यान जाने गरेको भन्दै सचेतनाको कार्यक्रम ल्याउन आग्रह गरेका छन्। मंगलबार बसेको प्रतिनिधिसभा बैठकको आकस्मिक समयमा गजुरेलले यस्तो ध्यानाकर्षण गराएका हुन्।

‘नेपाल प्रहरीको तथ्यांकअनुसार बर्सेनि ४०० जनाको पानीमा डुबेर र बगेर मृत्यु हुने गरेको तथ्यांक छ। विश्व स्वास्थ्य संगनठको तथ्यांक हेर्दा वार्षिक १५ सयको मृत्यु हुने अनुमान छ,’ उनले भने, ‘जेठको पहिलो हप्ता मात्रै सिन्धुलीको सित्खामा सुनकोशीमा ९ र १० वर्षका युवाको पानीमा डुबेर मृत्यु भयो । पर्याप्त जनचेतना, सुरक्षा, व्यवस्था, पूर्व सतर्कताको कमी भएर यस्ता घटना भएका छन्। विद्यालय, अभिभावक, स्थानीय पानीजन्य जोखिममा सचेतना गराउने कार्यक्रम ल्याउनुपर्छ।’