बाको त्यो अन्तिम उपचार र स्वास्थ्य प्रणालीको लुट  

कुशेऔंसी आउनुभन्दा ठीक तीन हप्ता अगाडि अर्थात् साउन शुक्लपक्षको अष्टमी तिथि। यो तिथि अरू कसैका लागि सामान्य एउटा दिन होला, तर मेरा लागि भने जीवनकै सबैभन्दा गहिरो घाउ र विच्छेदको दिन हो। यो मेरा बाको चौबीसौं पुण्यतिथि हो।

आजभोलि कुशेऔंसीका दिन फेसबुकका भित्ताहरू बाका तस्बिरहरूले रङ्गाउने होड चल्छ। जोसुकैले आफ्ना बासँगका पुराना–नयाँ फोटो पोस्ट गरेर श्रद्धा र भाव व्यक्त गरिरहेका हुन्छन्। तर, म आफूतिर हेर्छु- मसँग बासँगै उभिएर खिचिएको एउटा पनि फोटो छैन।