अपाङ्गता भएका व्यक्तिको निःशुल्क स्वास्थ्य बिमा गर्दै घिरिङ गाउँपालिका

तनहुँ, भदौ २६ गते। तनहुँको घिरिङ गाउँपालिकाले पालिकाभित्रका अपाङ्गता भएका नागरिक तथा तिनका परिवारलाई लक्षित गरी निःशुल्क स्वास्थ्य बिमा कार्यक्रमलाई निरन्तरता दिएको छ । पहुँचविहीन र आर्थिक रूपमा विपन्न नागरिकलाई स्वास्थ्य सेवाको पहुँचमा ल्याउने उद्देश्यले पालिकाले ‘ग’ र ‘घ’ वर्गको अपाङ्गता परिचयपत्र प्राप्त व्यक्ति र तिनका अभिभावकको बिमा शुल्क आफैँ बेहोर्ने भएको गाउँपालिकाले जनाएको छ ।

विगतका वर्षहरूमा जस्तै यस वर्ष पनि पालिकाले यो कल्याणकारी कार्यक्रमलाई अघि बढाएको छ । विपन्न तथा अपाङ्गता भएका नागरिकले बिमा प्रिमियम तिर्न नसकैका कारण स्वास्थ्य उपचारबाट वञ्चित हुनु नपरोस् भनेर यो कदम चालिएको गाउँपालिका अध्यक्ष होमबहादुर थापाले बताउनुभयो । “अपाङ्गता भएका व्यक्तिहरूलाई सहजरूपमा स्वास्थ्य उपचारको पहुँच पु-याउनु पालिकाको दायित्व हो,” अध्यक्ष थापाले भन्नुभयो, “यसले नागरिकलाई ठूलो आर्थिक राहत पुग्ने विश्वास लिएका छौँ ।”