ग्यास अभाव : प्राकृतिक कि व्यवस्थापकीय असफलता ?

खाना पकाउने एलपी ग्यासको अहिले चरम अभाव देखिएको छ । ग्यासको अभाव अब सामान्य आपूर्ति समस्या मात्र रहेन, राज्यको आपूर्ति व्यवस्थापन र नियमन क्षमतामाथि नै गम्भीर प्रश्न बन्न गएको छ । बजारमा ग्यासको एउटा सिलिन्डरका लागि सबै काम छोडेर उपभोक्ताले घण्टौँ लाइन बस्नुपर्ने अवस्था छ । तर अतिरिक्त रकम तिर्न तयार हुने हो भने त्यही ग्यास घर, होटल र रेस्टुराँसम्म पुगिरहेको छ ।

यसले अभाव वास्तविक हो कि कृत्रिम भन्ने प्रश्नलाई अझ गम्भीर बनाएको छ । नियमित मूल्य २ हजार ६० रुपैयाँ पर्ने ग्यासका लागि उपभोक्ताले ३ हजारदेखि ३२ सय रुपैयाँसम्म तिर्नुपरेको अवस्था सार्वजनिक भएको छ । कतिपय व्यापारीले तराईबाट ग्यास भरेर ल्याउने भन्दै खुलमखुला २५ सय रुपियाँसम्म अग्रिम भुक्तानी असुलिरहेको समेत पाइएको छ । कतिपय विक्रेताकहाँ ग्यास हुँदाहुँदै पनि रासन–पानीलायतका सामान नकिन्ने उपभोक्तालाई ग्यास नदिने गरिएको गुनासो पनि आम विषय भएको छ ।