संशोधनको समय नदिई नीति तथा कार्यक्रम पारित, विपक्षीको अवरोध

विराटनगर। संशोधन प्रस्ताव दर्ता गर्ने समय उपलब्ध नगराई सरकारको नीति तथा कार्यक्रम पारित गरिएको भन्दै विपक्षी दलहरूले अवरोध गरेपछि कोसी प्रदेश सभाको मंगलबारको बैठक स्थगित भएको छ। विपक्षीको विरोधका कारण सरकारले सदनमा आगामी आवको बजेटका सिद्धान्त र प्राथमिकता (प्रि-बजेट) पेस गर्न सकेन।

कोसी प्रदेशसभाको नवौँ अधिवेशनअन्तर्गत मंगलबारको छैटौँ बैठकमा मुख्यमन्त्री हिक्मतकुमार कार्कीले नीति तथा कार्यक्रममाथि उठेका प्रश्नको जवाफ दिएका थिए। मुख्यमन्त्रीको जवाफ सकिएलगत्तै सभामुख अम्बरबहादुर विष्टले नीति तथा कार्यक्रमलाई निर्णयार्थ प्रस्तुत गरेका थिए। हलबाट ‘हुन्छ’ भन्ने ध्वनि मत सुनिएपछि सभामुखले नीति तथा कार्यक्रम सर्वसम्मतिले पारित भएको घोषणा गरे। तर पारित भएको घोषणा हुनासाथ प्रमुख विपक्षी दल नेकपा (नेपाली कम्प्युनिस्ट पार्टी)का सांसदहरूले उठेर विरोध जनाएका थिए।