धार्मिक आस्था र जैविक विविधताको अनुपम संगम : पार्वती कुण्ड

रसुवा जिल्लाको आमाछोदिङ्मो गाउँपालिकास्थित पार्वती कुण्ड धार्मिक, सांस्कृतिक तथा पारिस्थितिक दृष्टिले महत्त्वपूर्ण सिमसार क्षेत्रका रूपमा परिचित छ । समुद्री सतहबाट २,६०६ मिटर उचाइमा अवस्थित यस तालको क्षेत्रफल करिब १.८७ हेक्टर रहेको छ । पार्वती कुण्डमा पछिल्ला वर्षहरूमा धार्मिक पर्यटक, प्रकृतिप्रेमी तथा अनुसन्धाताहरूको आकर्षण बढ्दो छ ।

स्थानीय किंवदन्तीअनुसार भगवान् शिव गोसाइँकुण्डतर्फ ध्यानका लागि जाँदा माता पार्वती उहाँको खोजीमा यस क्षेत्रमा आइपुगेर कुण्डमा स्नान गर्नुभएको विश्वास गरिन्छ । यही धार्मिक आस्थाका कारण हिन्दू र बौद्ध धर्मावलम्बीहरू नेपालका विभिन्न क्षेत्र तथा विदेशबाट समेत यहाँ पुग्ने गरेका छन् ।