खाडीबाट फर्केर गाईपालन, मासिक दुई लाखभन्दा बढी आम्दानी

रोजगारीका लागि आठ वर्षसम्म साउदी अरब बसे पनि अपेक्षित आम्दानी गर्न नसकेपछि घर फर्किएका पर्वतका एक युवाले व्यावसायिक गाईपालनबाट मासिक दुई लाख रुपैयाँभन्दा बढी आम्दानी गर्दै आएका छन्।

पर्वतको जलजला गाउँपालिका–८ फर्सेका ४५ वर्षीय नारायण जिसी विगत १३ वर्षदेखि व्यावसायिक गाईपालनमा संलग्न छन्। उनको गोठमा १२ वटा गाई र एउटा भैँसी छन्। दैनिक ७५ देखि ८० लिटर दूध उत्पादन गरी बजारमा बिक्री गर्दै आएका जिसीले गाईपालन सुरु गरेपछि आठ वर्ष साउदी अरब गएर काम गरे पनि आफ्नै गाउँमा बढी आम्दानी हुने देखेपछि फर्केर व्यवसाय विस्तार गरेको बताए।