सरकार, ग्यास कहाँ छ?

प्रतिनिधिसभाको नियमित बैठकमा शुक्रबार सत्तापक्ष र प्रतिपक्ष दुवैतर्फका सांसदहरूले सरकारको कार्यसम्पादनमाथि तीखो प्रश्न उठाएका छन्। बिहीबारको बैठकमा सांसदहरूले गम्भीर बहसमा ध्यान दिन सकेनन् तर शुक्रबारको बैठकमा भने बजारमा ग्यासको चरम अभाव, स्वास्थ्य सेवामा व्याप्त बेथिति, हालैको बाढीपहिरोपछिको उद्धार र पुनर्निर्माणमा देखिएको सुस्तताबारे सरकार कहाँ छ भन्दै प्रश्न उठाएका थिए।

सबैजसो सांसदको स्वर उस्तै थियो नागरिकले दैनिक जीवनमा भोगिरहेका सास्तीप्रति सरकार गम्भीर नभएको र जिम्मेवारीबाट पन्छिने प्रवृत्ति मौलाइरहेको भनेर। बजारमा ग्यास अभाव हुँदा सर्वसाधारणको चुलो बल्नसमेत कठिन भइरहेको भन्दै सांसदहरूले सरकारप्रति तीव्र आपत्ति जनाए।